Air Greenlandip angalatitsivik Ruby-Rejser suleqatigalugu timmisartuutileqatigiiffiit attartortitsisartut Airseven aamma Copenhagen Air Taxi (CAT) 12. juunimiit 1. septembarimut Aalborgip aamma Nuup akornanni sapaatit akunnerannut marloriarlutik timmisartuussisarnissaat pillugu codeshare-mut isumaqatigiissuteqarfigai. Taamaalilluni Air Greenlandip timmisartumi, Boeing 737-800-mi issiaviit aalajangersimasunik amerlassusillit atorsinnaalerpai.
Nalinginnaasumik tunisassiaq – pisiarinnginnerani – sunik imaqarnersoq paasiniarluassallugu pitsaasarpoq. Pingaartumillu timmisartumut bilitsisiniaraani! Taamaattumik Q&A – apeqqutit akissutillu – allattukkat, Aalborgip Nuullu akornanni angallavimmut atuuttut uku suliaraagut. Apeqqutigerusutat nassaarinngikkukku mail-imik info@airgreenland.gl aqqutigalugu nassiussisinnaavutit, apeqqullu pisariaqarpat allattukkanut ilanngussinnaavarput.
Timmisartumut bilitsissat nittartagarput www.airgreenland.gl imaluunniit najukkanni angalatitsivik aqqutigalugu inniminneruk.
Angalanissamik inniminniinnginninni ilisimassallugit iluaqutaasussat
Codeshare-mut isumaqatigiissut sunaana?
Codeshare-mut isumaqatigiissut timmisartuutileqatigiiffiit akornanni suleqatigiinnissamut isumaqatigiissutaavoq, tassanilu ingerlatseqatigiiffik ataaseq angallavimmi timmisartuussisarput, ingerlatseqatigiiffiillu allat timmisartuussinermut tassunga bilitsinik tuniniaasarput – namminneerlutik atitik timmisartumullu normuliussartik atorlugu. Tassalu ingerlatseqateqatigiiffimmi ataatsimi bilitsisisinnaavutit, kisiannili ingerlatseqatigiiffimmit allamit timmisartuunneqassallutit.
Sooq timmisartuutileqatigiiffiit taamatut suleqatigiinnissamut isumaqatigiissuteqartarpat?
Nammineerluni angallavinni tamani timmisartuussinngikkaluarluni, taamaalillunilu atuisut angallaviit qinigassaat amerlanerulersinniarlugit ornigassanut amerlanerusunut neqeroorsinnaaniarlutik.
Atuisunut iluaqutissat:
- Qinigassat amerlanerusut angallaviillu pitsaanerusut
- Ingerlatseqatigiiffiit akimorlugit bilitsinik inniminniisarneq ajornannginnerusoq
- Nalinginnaasumik nassatat aqqutit tamakkerlugit nassiunneqartarput – aamma ingerlatseqatigiiffiit akornanni nuukkaluaraanni.
Timmisartuussinermi angalasumut kina akisussaasuua?
Timmisartuussisoq, matumani Airseven – CAT, ukununnga atatillugu angalasumik isumassuinissamut akisussaasuuvoq:
- Kinguaattoornerit, taamaatitsinerit sinniillunilu inniminniinerit.
- Allamut inniminniinerit, nerisaqarnerit unnuinerillu.
- Nassatanik isumaginninnerillu taarsiissuteqarnerillu.
Ingerlatseqatigiiffik bilitsisiffigisat ukununnga ikiuussinnaavoq:
- Atuisunik kiffartuussinerit attaveqarnerillu.
- Allannguinerit utertitsinerilluunniit.
Assersuut: Air Greenlandimut bilitsisivutit, kisiannili CAT – Airseven-ip timmisartuanut ilaasussaallutit. Timmisartoq taamaatippat CAT – Airseven aaqqiiniartussavoq, kisiannili Air Greenlandip allannguinissamut utertitsinissamulluunniit ikiorsinnaavaatit.
Timmisartup angallavissaa allanngortinneqarpat (nikisinneqarpat) angalanissamut pilersaarummut atugassannut kina a kisussaasuua?
Airseven timmisartoq ornitaminut missinnaanngippat timmisartup sumunnarnissaanut aalajangiisussaavoq. Timmisartuussinermi timmisartup naalagaa aquttualu tamanna pillugu annertunerusumik ilisimatitsissapput. Taamatut pisoqartillugu suut atuuttussaanersut pillugu akissut matuma siuliani allassimasoq atuaruk.
Aallannginnermi iisimassallugit iluaqutaasussat
Kina check-in-imik isumaginnittuussava?
Aalborgip mittarfiani ingerlatseqatigiiffik sullissisuusoq – tassanilu matumani CAT – Airseven – aamma Nuup Mittarfiani Air Greenland isumaginnittuussapput.
Timmisartup iluani sumi issiassanerlunga nammineq aalajangersinnaavara?
Illit najukkanniluunniit angalatitsivik bilitsissannik Air Greenland aqqutigalugu inniminniisimagussi, række 1-32-mi issiaviit D, E aamma F, Air Greenlandip sullitaanut inniminnikkat atorneqassapput. Angalanissannik inniminniininni issiavimmik toqqaasinnaavutit, imaluunniit check-in-imi sulisut issiaviit arlaat inuttalerneqarsimannginnersut pillugu aperisinnaavatit.
Qanoq annertutigisumik nassarsinnaavunga?
Illit najukkanniluunniit angalatitsivik bilitsiffigisat aqqutigalugu Air Greenland aqqutigalugu inniminniisimagussi, Air Greenlandip nassatanut maleruagassiai atuutissapput. Timmisartumut bilitsimut ataatsimut nassatat 20 kg-t tunniunneqarnissaat ilaavoq, kiisalu tigummiaannarlugit nassatat 8 kg-t nassarneqarsinnaallutik. Sinniisimaguit kiilumut akiliissaatit. Air Greenlandip nassatanut maleruagassiai, aammalu qanoq ilillutit sinniininnut akiliisinnaanerlutit annertunerusumik atuagaqarsinnaavutit, uani: Overvægt – Air Greenland
Angalanissat Ruby Rejser aqqutigalugu pisiarisimagukku, bilitsinni nassatat amerlinerinut pisisinnaanermut periarfissat pillugit taakkununnga innersuukkusuppatsigit.
Aallannginninni qanoq ilinerani tunniussereertussaavunga?
Nuummi check-in pillugu Greenland Airports-ip nittartagaani atuagaqarit: Check-in - Greenland Airports. Aalborgimmi check-in pillugu Aalborgip Mittarfiata nittartagaani atuagaqarit: Check-in og Security | Aalborg Lufthavn
Aalborgimi (AAL) aamma Nuummi (GOH) sumut tunniussissaanga?
Check-in-ertarfiit skærmikkut Airseven CAT667/761-imik imaluunniit Air Greenland GL750/751-imik allassimasut ornikkit.
Aalborgimi Air Greenlandip sulisuinik sulisoqarpa?
Naagga, kisianni Aalborgip Mittarfiani sulisut ikiuukkumatuut saaffigisinnaavatit.
Online-kkut check-in-ersinnaavunga?
Naagga, online-kkut check-in-ertoqarsinnaanngilaq, suleqatigiinni IT-mut atortut assigiinngimmata. Mittarfimmi check-in-ertarfimmut tunniussissaatit.
Kalaallit Nunaanni ingerlaqqittussaavunga. Apuuffissama tungaanut nassatakka ingerlaannartussanngorsinnaavakka?
Aap, illit najukkanniluunniit angalatitsiviup timmisartumut bilitsissat ataannartussanngorlugu Air Greenlandimut inniminnersimagussiuk, nassatatit apuuffissannut ingerlaannartussanngortinneqassapput. Imaassinnaavoq, Nuummi Air Greenlandip saaffiginnittarfianut ingerlaqqinnissamut ikissutissannik pissarsiniarlutit saaffiginnittariaqassasutit.
Bilitsit Ruby Rejser aqqutigalugu pisiarisimagukku, nassatatit ingerlaannartussanngorlugit tunniussinnaanngilatit, taamaattumillu Nuup Mittarfiani nassatatit aassavatit check-in-ertarfimmullu tunniullugit.
Timmisartuussinermi uumasunik nassartoqarsinnaava?
Aap, usilersortarfimmi uumasut puui amerlanerpaamik marluusinnaapput aamma timmisartup initaani marluusinnaallutik.
Meeraq angalaqateqanngitsoq Airseven-imut ilaasinnaava?
Aap, kisianni mittarfinni/illoqarfinni akunniffissani tamani attaveqarfissamik peqassaaq. Meeqqamut angalaqateqartussaanngitsumut qanoq ilillutit inniminniisinnaanerlutit una atuaruk: Uledsaget barn – Air Greenland
Timmisartup iluani kiffartuussineq pillugu ilisimassallugit iluaqutaasussat
Timmisartumi kiffartuussineq qanoq ittoq misigissavara?
Air Greenland aqqutigalugu ilaasussat Imarpik qulaallugu timmisartuussiffitsinni kiffartuussinerup assinganik kiffartuunneqassapput. Nerisassat bilitsip akianut ilaapput. Aalborgimiit Nuummut timmisartuussinermi ullaakkorsiutit oqitsut sassaalliutigineqartarput, aammalu Nuummiit Aalborgimut ullup qeqqasiutit oqitsut sassaalliutigineqartarput. Imeruersaatit marluk (imeq, sodavandi, immiaaraq imaluunniit viinni) nerisassanut ilaatinneqarput, taamatullu kaffi/tii bilitsip akianut ilaatinneqarluni. Aamma Airseven imeruersaatinik allanik, timmisartumi pisiarineqarsinnaasunik tuniniagaqarpoq.
Air Greenlandip sulisuinik timmisartumi sulisoqarpa?
Naagga, timmisartoq Airseven-imeersuummat, sullissisup timmisartumi sulisui timmisartuussinermi sulisorineqarput. Timmisartup kalaallisut oqaluttunik sulisoqarnissaa naatsorsuutigineqarsinnaanngilaq.
Airseven aliikkutassatut atugassanik peqarpa?
Timmisartup issiavittaasa iigarfii tv-skærmeqanngillat, kisiannili mobiili tabletiluunniit atorlugu timmisartup Wi-Fi-anut attavilertoqarsinnaavoq, QR-kode-lu, filminik tv-kkullu nangeqattaartunik assigiinngitsunut ammaasussaq scannerneqarsinnaalluni, taamatullu trackeri atorlugu timmisartuussineq malinnaaffigineqarsinnaavoq. Internetimut attavilertoqarsinnaanngilaq.
Timmisartumi mobiilip tabletilluunniit batteriivinik immisoqarsinnaava?
Naagga, timmisartut ilaanni pisartutut sarfalersuivimmut kabelimik ikkussisoqarsinnaanngilaq. Taamaattumik aallannginninni mobiilivit/tabletivit batteriianik immiissasutit inassutigaarput.
Timmisartumi akitsuuteqanngitsunik pisiniartoqarsinnaava?
Nioqqutissat tuniniakkat Air Greenlandip Imarpik qulaallugu angallassiviini allani tuniniagaasunit allaanerupput, kisianni Airseven ajorisassaanngitsunik tuniniagaqarpoq. Kisianni tupanik imigassanillu aalakoornartortalinnik akitsuuteqanngitsunik tuniniagaqanngilaq.
Nuummut mereernermi
Nuup mittarfiani nassatat sumi tunniunneqartarpat, aamma qanoq sivisutigisumik utaqqissaanga?
Timmisartut sullinneqartut qanoq amerlatigineri apeqqutaalluni utaqqisarneq allanngorarsinnaavoq. Timmisartut amerlasuut unittarfimmiippata, nassatat timmisartumiit nassatanik tunniussivimmut, tassanngaanniillu terminalip qalianut ingerlateqqinnissaannut utaqqingaatsiartoqalaarsinnaavoq. Taamaattumik utaqqininni Greenland Airport-imi nioqqutissanik akitsuuteqanngitsunik qimerluuinissamut piffissaqassaatit. Eqqaamajuk, pisiniarninni ikissutigisat scannertussaagakku.
Kinguaattoorlunga tikinnera peqqutigalugu Nuummut Nuummiillu ingerlaqqiffissara angumerinngikkukku qanoq iliussaanga?
Kalaallit Nunaannut aamma Kalaallit Nunaanniit aallannginninni naatsorsuutigisavit naleqqussarnissaat tassani pingaaruteqartorujussuuvoq. Qulimiguullit timmisartullu suluusallit, aammalu timmisartut sukkasuuliat atorlugit sinerissami isorartuumi, angallassinissamut pilersaarutip ingerlanneqarnerani silap annertuumik sunniuteqarfigisaani timmisartuussinermi angalanissamut pilersaarutinnut sunniuteqarsinnaasumik kinguaattoortoqarsinnaammat ilisimassallugu pingaaruteqarpoq. Taamaattumik angalasunut inassutigaarput, tamanna sullissisut allat, soorlu qimuttuisunik, timmisartunik, imaatigut angallatinik, bussinik assartuutinilluunniit allanik atuisut atorlugit ingerlaqqinnissamut pilersaarusiulerunik eqqarsaatigeqqullugu. Tamanna aamma akunnittarfimmi unnuinissamik pisinermut atuuppoq.
NB! A-miit B-mut, C aqqusaarlugu timmisartumik angalanissamik ataqatigiimmik Air Greenland aqqutigalugu pisisimaguit, angalasunut angalanissamut pilersaarummik nassiussinissarput isumagisaratsigu, aammalu angallavitsinni apuuffissavit tungaanut angalanerit tamakkerlugu isumassorneqarnissat isumagisussaagatsigu ilisimassallugu iluaqutaasussaavoq. Tamanna sunik nassataqartussaanersoq Air Greenland aqqutigalugu nittartakkatsinnut atuagaqarsinnaavutit.
Angalalluarina!
Ilisimaviuk…
Air Greenland nunatsinni timmisartuussinermik ingerlatsinermik ukiuni 65-ingajanni misilittagaqarmat, aammalu Europami ingerlatsinissamut akuersissutit (AOC – Air Operator Certificate) pisariunersaasa ilaannik peqarmat? Uppernarsaammi tassani timmisartuutileqatigiiffiup niuernermik tunngaveqarluni timmisartuussinissamut sullisseriaatsit, isumalluutit isumannaallisaanermilu iliuutsit eqqortut pigineqarneri uppernarsarneqarpoq. Uppernarsaat nunami namminermi silaannakkut angallassinermut oqartussaasunit tunniunneqartarpoq, Air Greenlandimullu tunngatillugu Danmarkimi Angallannermut Aqutsisoqarfik piumasaqaatit tamarmik naammassineqarnissaat qulakkeerniarlugu ingerlaavartumik nakkutilliisuuvoq misissuisarlunilu.
Naatsumik oqaatigalugu AOC akuersissutaavoq pisariaqartoq, ingerlatseqatigiiffiup niuernermik tunngaveqarluni timmisartuussinissamut sullisseriaatsinik, isumalluutinik isumannaallisaanermilu iliuutsinik eqqortunik atuineranut uppernarsaataasoq.