Teknikkimut tunngasut pissutigalugit pilersaarutaasumik timmisartup atorneqarsinnaannginneranik kinguneqarsinnaapput.
Tamanna soorlu assersuutigalugu makkuninnga pissuteqarsinnaavoq:
- teknikkikkut ajoqutaasut imaluunniit pissutsit pissusissamisuunngitsut
- immikkut ittumik misissuinissaq imaluunniit aserfallatsaaliuinissaq
- timmisartuussinissami pineqartumi pissutsit teknikkimik piumasaqaatit timmisartumit naammassineqarsimannginnerat
Taamatut pisoqartillugu timmisartuussinissaq allanngortittariaqartarpoq isumannaatsumik timmisartuussinissaq akuerisaassumillu angallassinissaq qulakkeerumallugu.
Timmisartoq qulimiguulilluunniit teknikkikkut ajoquteqarpat kingoraartissamik pissarsiniarnissamik kinguneqarsinnaasarpoq, kingoraartissarlu timmisartumut qulimiguulimmullu apuunniarnissaa sumiinnersoq apeqqutaalluni sivisusinnaasarpoq.
Sooq sumiiffimmi allami allannguineq timmisartornissannut sunniuteqarsinnaava?
Air Greenlandimi angallannermut pilersaarutit imminnut atalluinnarput. Taamaattumik sumiiffiit ilaanni kinguaattoorneq imaluunniit allanngortitsineq Kalaallit Nunaanni sumiiffinni allani timmisartuussinernut sunniuteqarsinnaavoq.
Qanoq ilisimatinneqassaanga?
Angalanissat ullormut allamut nuutinneqarpat SMS imaluunniit e-mail aqqutigalugit sukkanerpaamik ilisimatissavatsigit. Allanngortoqarneranut peqqutaasumik ilisimatinneqassaatit angalanissavillu ingerlaqqinnissaanik.
Sooq siusinnerusukkut aallarsinnaanngilanga?
Angallannermi pilersaarutini allanngortoqarnera sorpassuarnik kalluaasarpoq. Ullormi pilersaarutaasutut timmisrtuussinerit ingerlattussaavavut misissorlugulu timmisartuussinerit amerlinissaannut periarfissaqarnersoq.
Taamaassappat timmisartussaqartariaqarpoq imaluunniit qulimiguuleqarluni, inuttassaqarluni qasuersaarnissamut aalajangersakkat iluanni timmisinnaasunik. Tamatuma saniatigut sila, mittarfimmi pissutsit allallu ingerlatsinermut pissutsit inissinneqartariaqarput. Inissaarussimappat siusinnerusukkut aallarnissamut nuussisinnaanngilagut. Taamaattorli piffissaq kingullerpaaq atoralugu inissaqaleriasaarsinnaasarpoq ilaasussaq takkussimanngippat tamatuminngalu ilisimatinnata. Tamannalu aatsaat paasisinnaasarparput nassatanik tunniussineq matugaangat.
Sooq timmisartornanga umiartussaanga?
Sumiiffiit ilaanni ima pisoqarsinnaasarpoq qulimiguulimmut taarsiullugu angallammik angalasariaqalerluni. Matumani aqqut, sila sumiiffimmilu pissutsit apeqqutaasarput.
Qulimiguulimmik timmisartuussinermi silamut isikkivimmullu piumasaqaatit minnerpaaffissaqartarput. Sila isikkivillu timmiffiiunissaanut piumasaqaatit killinganiippata, qulimiguulik, sillimaniarneq piumasaqaatillu malillugit, timmisinnaanngitsutut nalilerneqartarpoq.
Umiatsiamik angalasoqaraangat tamanna pisarpoq angallatinik ilaasoqarnissamut akuerisaasunik isumaqatigiissuteqarnikkut.