Powerbankit aamma litiumbatteriit immikkoortut tamarmik tigummiaannakkami nassarneqassapput, kisianni nassatanut tunniunneqartunut ilanngullugit nassarneqaqqusaanngillat. Tamanna aammattaaq atuuppoq tigummiaannakkat gate-mi nassatanut tunniunneqartariaqaleraluarpata.
Qanoq angitigisunik batteriinik nassataqarsinnaavit?
- Ataaseq 100 Wh tikillugu: Tigummiaannakkami immikkut akuersissuteqaqqaarnak nassarsinnaavat.
- Ataaseq 100 Wh sinnerlugu 160 Wh tikillugu: Angalanerit sioqqullugu Air Greenlandimit akuersissummik peqqaassaatit. Akuersissummik piniarnissamut Attavigitigut aqqutigalugu Callcenter attavigiuk, aammalu akuersissut check-inimi takutinniarlugu nassassavat. Angissusilinnik taama ittunik batteriinik immikkoortunik annerpaamik marlunnik nassataqarsinnaavutit.
- Ataaseq 160 Wh sinnerlugu: Tigummiaannakkami imaluunniit nassatanut tunniunneqartuni nassarneqaqqusaanngilaq.
Inuk ataaseq powerbankinik marlunnik annerpaamik nassataqarsinnaavoq.
Toqqorsineq aammalu timmisartumi isumannaallisaaneq
Powerbankivit timmisartumi angalanerni issiaviup saavani kaasarfiusaami inissinneqarnissaa piumasarineqarpoq. Nassatalerivimmut matusartumut issiaviup qulaanut inissinneqaqqusaanngilaq. Taamaalilluni illit timmisartumilu sulisut kissarpallaalissagaluarpat imaluunniit pujuliulissagaluarpat sukkasuumik malugisinnaavaat.
- Powerbank timmisartumi immersorneqassanngilaq.
- Powerbankivit batteriia kabilillu immikkuaaluttut kortslutningeqalinnginnissaat isumagissavat, assersuutigalugu immikkut illersuutitalimmik puumik imaluunniit batteriit polii ammasut nipittakkamik matusarlugit.
- Powerbankit imaluunniit batteriit nalinginnaasumit kissannerulerpata, pullannerulerpata, ikuallannertut naamasalerpata imaluunniit pujortalerpata sulisut ingerlaannaq attavigikkit.
Mobilit, tabletit aammalu qarasaasiat angallattakkat
Atortut elektroniskiusut battereqartut, soorlu mobilit, tabletit qarasaasiallu angallattakkat, tigummiaannakkami nassarneqassapput.
Batterip angissusaa ilisimanngiliuk?
Batterip piginnaasai Wh (watt-tiimit) atorlugit nalunaarneqartarput, tamannalu nalinginnaasumik batterip imaluunniit powerbankip qaavani allassimasarpoq. Paasissutissaq nassaarisinnaanngikkukku, nioqqutissiortup nittartagaa alakkarsinnaavat imaluunniit angalanissat sioqqullugu nioqqutissiortoq attavigalugu.