Sakkut imassallu nalinginnaasumik nassatatut tunniussatut akuerineqartarput. Aallarnissaq nalunaaquttap akunnerisa aappaata affaa sioqqullugu tunniussineq naammassereersimassaaq. Sakkoqarnissamut akuersissut atuuttoq nassarneqassaaq, aammalu nalunaarut immersorneqassaaq atsiorneqassallunilu.
Mittarfimmut apuunnermi, kingusinnerpaamik 1 time sioqqullugu takkutissaatit, aallaasit nalunaarsorneqarniassammat. Siumut aallaat piareersarsimassaaq imassaajaqqassaaq, aammalu silusaataa peersinnaappat peerneqassalluni.
Aallaammut imassat immikkut poortorsimallutillu poorisaminniiginnassapput. Imassat nassatat annerpaamik 5kg inuup ataatsip nassarsinnaavai. Imassat amerlanerusut nassarniarukkit nassiussatut ingerlatinneqassapput.
Sakkumut nalunaarut aajuk immersorlugulu »
Imatut pisoqartillugu akuersissummik piniartoqassaaq:
Sakkut Kalaallit Nunaata Danmarkillu akornanni: Sakkup suunera, angissusia, tunisassiarineqarnermini normua il.il. ilisimatitsissutigikkit. Danmarkimi/Kalaallit Nunaanni najukkami politeqarfimmit eqqussinissamut akuersissummik takutitsinikkut akuersissut Kalaallit Nunaanni/Danmarkimi Politimestereqarfimmit suliarineqassaaq.
Sakkut Danmarkip avataani nunanit allaniit Kalaallit Nunaannut angalanermi nassarneqartut: Nunamit najukkamit annissinissamut akuersissut, kiisalu EU-mi sakkulisarsinnaanermut pas-i tungujortoq atuuttoq.
Sakkut qanorluunniit ittut nassatatut, usilersortarfimmut ikisassatut taamaallaat akuerineqartarput. Sakkut isumannaatsumik suussusiilu paasinanngitsunngorlugit poortorneqassapput, aammalu imassat aallaasillu makisartua, natequt, peerneqassapput immikkullu poortorneqassallutik.
Ilaasup nassatanik tunniussinermini paasissutissat uku tunniutissavai:
- Sakkup suussusia; qoorortooq, timmiarsiut, illuinnarsuut (pistol, revolver) allaluunniit
- Imassat suussusii; imassat nuullit, amerlasuut aqerlumik sanaat, amerlasuut saviminermik sanaat allalluunniit (imassat qaarsinnaasunik ikuallannermillu pilersitsisinnaasunik imaqassanngillat).
- Imassat oqimaassusii – annerpaamik 5 kg-nik oqimaassuseqassapput
Immikkut ittunik pisoqartillugu
Sakkut Kalaallit Nunaanni najugaqavissut Kalaallit Nunaata iluani angalanerminni immikkut akuersissutitaqanngitsumik nassarsinnaavaat.
- Inatsisit atuuttut malillugit sakkunik imassaannillu pisinissamut, peqarnissamut, tigumiarnissamut, atuinissamut, annissinissamut imaluunniit eqqussinissamut immikkut akuersissuteqartoqarsinnaavoq.
- Naalagaaffiup Silaannakkut Angallannermut Pisortaqarfiani Silaannakkut Angallannermut Nakkutilliisoqarfiup immikkut ittumik akuersissuteqarneratigut timmisartup iluani sakkunik imassaannillu nassataqartoqarsinnaavoq.