Angalanerit Air Greenlandimi toqqaannartumik pisiarisimagukku, taava una Bilitsera atorlugu allanngortitsisinnaavutit, akisunermut nuussinnaavutit imaluunniit bilitsit taamaatiinnarsinnaavat. Bilitsip qanoq ittuunera illit periarfissannut apeqqutaavoq.
Angalatitsivik aqqutigalugu angalanerit pisiarisimagukku, taava angalatitsivik ikiorneqarniarlutit saaffigissavat.
Allanngortitsinerit ingerlanneqassapput kingusinnerpaamik angalanissap aallartinnissaa nalunaaquttap akunnerinik marlunnik sioqqullugu.
Takuss, Standard aamma Premium
Qaammatisiutit ulluat imaluunniit ornitassaq allanngortissinnaavat inummut ataatsimut DKK 750,- akilerlugit, aammattaaq bilitsip atuuttut aamma nutaaq akiata assigiinngissutigisinnaasaat. Tamanna atuuppoq Kalaallit Nunaanni angalanermi aamma atlantikorsuakkut.
Allanngortitsinermut akiliutit imatut naatsorsorneqartarput:
- Angalaneq ataatsimoortumik pisiarineqarsimasoq: Inummut ataatsimut akiliut DKK 750,-.
- Angalanerit immikkut pisiarineqarsimasut: Angalanernut allanngortinneqartunut ataasiakkaanut tamanut akiliut.
- Aallarluni aamma angerlarluni angalanerit ataatsikkut allanngortinneqartut: Inummut ataatsimut akiliut ataaseq, angalaneq ataatsimoortumik pisiarineqarsimappat.
-
Aallarluni aamma angerlarluni angalanerit piffissani assigiinngitsuni allanngortinneqartut: Allanngortitsinernut ataasiakkaanut inummut ataatsimut akiliut.
Standard Flex aamma Premium Flex
Qaammatisiutit ulluat imaluunniit ornitassaq allanngortissinnaavat maleruaqqusat illit bilitsinnut atuuttut malillugit. Akiisa assigiinngissutigisinnaasaat aamma allanngortitsinermut akiliutaasinnaasoq allanngortitsinermi takuneqarsinnaavoq.
Angalaneq imatut allanngortissavat
Angalanerit Air Greenlandimi toqqaannartumik pisiarisimagukku, taava una Bilitsera atorlugu allanngortitsisinnaavutit, tassani akia takusinnaavat.
Air Greenlandimi Call Centerimit ikiorneqarnissat kissaatigigukku, taava attaveqarfigisinnaavatsigut una Attavigitigut aqqutigalugu. Call Centeri aqqutigalugu bilitsimik allanngortitsinermi sullinneqarnermut akiliut akilersinneqartussaq tassaavoq inummut ataatsimut DKK 300,- akit assigiinngissutigisinnaasaat aamma allanngortitsinermut akiliutip saniatigut.
Nunami namminermi angalanermut bilitsi nunanut allanut angalaninngorlugu allanngortinneqarsinnaanngilaq imalluunniit killormut, tamatumunnga pissutaavoq bilitsit nioqqutaasut assigiinnginnerat.
Atimik allanngortitsineq
Bilitsit qanoq ittuunerini tamani ateq allanngortinneqarsinnaavoq inummut ataatsimut DKK 900,-. akiliutigineqassaaq.
Bilitsi Air Greenlandimi toqqaannartumik pisiarisimagukku, taava una Attavigitigut aqqutigalugu attaveqarfigissavatsigut.
Angalatitsivik aqqutigalugu bilitsi pisiarisimagukku, taava angalatitsivik saaffigissavat.
- Angalaneq ataatsimoortumik pisiarineqarsimasoq: Inummut ataatsimut akiliut DKK 900,-.
- Angalanerit immikkut pisiarineqarsimasut: Angalanernut allanngortinneqartunut ataasiakkaanut tamanut akiliut.
Akisunnermut allanngortitsineq
- Takuss aamma Standard allanngortinneqarsinnaapput uunga Premium.
- Standard Flex allanngortinneqarsinnaavoq ukununnga Premium imaluunniit Premium Flex. Allanngortitsiguit uunga Premium, taava bilitsip akia tamarmiusoq utertinneqarsinnaajunnaassaaq.
Akisunermut allanngortitsineq kingusinnerpaamik angalanissap aallartinnissaa nalunaaquttap akunnerinik marlunnik sioqqullugu ingerlanneqassaaq. Taamaattumik tunniussinermi akisunermut allanngortitsineq ajornarpoq.
Bilitsit Air Greenlandimi toqqaannartumik pisiarisimagukku, taava una Bilitsera aqqutigalugu akisunermut allanngortitsisinnaavutit. Akianut apeqqutaavoq bilitsip atuuttup akiata aamma bilitsip nutaap akiata assigiinngissutaat. Tamanna atuuppoq angalanermi qaammatisiutip ullua allanngortinneqarpat allanngortinneqanngippalluunniit.
Akisunermut nuussineq peqqissimissutigineqarsinnaanngilaq, aamma taamaappoq nalunaaquttap akunnerisa 24-t iluanni allanngortitsisinnaanermut pisinnaatitaanerup iluani. Taamaattumik akisunermut nuussinerit utertissinnaanngilat bilitsip suuneranut aallaqqaataani atuuttumut utertillugu allanngortikkaluaraluunniit.
Utertitsineq
Bilitsit taamaatiinnarneqarsinnaapput internet aqqutigalugu aallarnissaq sioqqullugu nal. akunneri marluk tikillugit. Aningaasanut utertissinnaasannut apeqqutaapput, bilitsinut malittarisassat kiisalu utertinneqartut akiliinermi kortimut, pisinermi atorneqartumut, utertinneqassapput.
Timmisartornerit atorneqarsimasut aamma inniminniinermik taamaatitsisinnaanermut sillimmasiissummik pisimaneq utertinneqassanngillat.
Bilitsi allanngortinneqassappat uunga Flex-bilitsi
Akisunnermut nuussinerup aallaqqaataani bilitsip akia utertinneqarsinnaanngitsoq utertinneqarsinnaalissanngilaa. Taamaatitsinermi utertinneqassaaq taamaallaat akiisa assigiinngissutaat utertinneqarsinnaasoq, tamatuttaaq utertinneqarsinnaasut mittarfimmut akileraarutit aamma akitsuutit. Allanngortitsinermut imaluunniit akisunermut nuussinermut akiliutaasimasinnaasut uterterneqartanngillat.
Assersuut: Illit Takuss imatut akilik DKK 4.000,- allanngortippat uunga Standard Flex akilik DKK 5.000,- kiisalu akilerpat DKK 1.000,- akiisa assigiinngissutaat aammattaaq DKK 750,- allanngortitsinermut akiliutitut. Taamaatitsiinnarnermi illit pissarsiarissavatit DKK 1.000,- utertitaq aammattaaq mittarfimmut akileraarutit aamma akitsuutit utertinneqarsinnaasut. Allanngortitsinermut akiliut utertinneqassanngilaq.
Nal. akunnerini 24-ni peqqissiminissamut pisinnaatitaaneq
Bilitsimik pisinerit peqqissimissutigisinnaavat pisinerup kingornatigut nal. akunnerisa 24-t iluanni, kiisalu bilitsip akia tamakkerlugu utertissavat, angalaneq tamakkerlugu taamaatiinnarukku.
Attaveqarfigitigut una Attavigitigut aqqutigalugu peqqissiminissamut pisinnaatitaaneq atorniarukku.
Peqqissiminissamut pisinnaatitaaneq allanngortitsinermut akiliutinut, akisunermut allanngortitsinermut imaluunniit issiaffissamik toqqaanissamik pisiaqarnermut atuutinngilaq.
Issiaffissamik toqqaaneq
- Standard aamma Premium: Nalinginnaasumik issiaffissamik toqqaaneq inniminniinermi akeqanngilaq. Issiaffissat imminnut nissunik inissaqartitsisut ilaanngillat.
- Takuss: Issiaffissamik toqqaaneq akeqarpoq DKK 150,- inummut ataatsimut inniminniinermi.
Issiaffissamik toqqaanermik pisineq peqqissimissutigineqarsinnaanngilaq imaluunniit utertinneqarsinnaanngilaq.
Pisisartut inuussutissarsiutillit
Inuussutissarsiutilittut pisisartuugaanni taava suliffeqarfiup inniminniisarnermut akisussaasua inuussutissarsiutillit isertarfiat atorlugu isissaat angalanermut takussutissiami angalaneq nassaaralugu.