Air Greenlandimi nalunngilarput uumasuutivut ilaqutariit ilaattut pingaaruteqartuusut, taamaattumillu neqeroorutigaarput periarfissiissalluta timmisartuussinerni periarfissaqartoqarnera aamma akuersissutit piumasaqaataasut pissarsiarineqarnerat apeqqutaatillugu uumasunik angallassinissaq.
Inniminniineq aamma akuersissutit:
- Piffissaalluartillugu attaveqarfigitigut – uumasuutigisanik assartuinissamut inissat killeqarmata innersuussutigaarput sapinngisamik siusinnerpaamik apeqquteqaateqarnissat – iluaqutaassaaq inniminniininnut atatillugu – una aqqutigalugu imaluunniit Callcenteritsinnut sianernikkut uunga +299 70 12 12.
Tamatuma kingornatigut misissussavarput aallarfissami kissaatigineqartumi uumasumik angallassisinnaanissamut periarfissaq. Inissaqarnera uppernarsarneqareerpat uumasumik angallassinissaq illit inniminniininnut allanneqassaaq.
- Aallannginnermi uumasup eqqunneqarsinnaaneranut akuersissut pissarsiarineqassaaq: Uumasuutigisat ilagalugu Kalaallit Nunaannut angalassaguit Grønlands Repræsentation i København (Kalaallit Nunaata Sinniisoqarfianut) uumasuutivit eqqunneqarsinnaaneranut akuersissummik qinnuteqassaatit. Akuersissummik peqartoqartinnagu uumasuutigisaq angalaqatigineqarsinnaanngilaq.
- Aajuk aamma uumasumik angallassinermut uppernarsaat immersorlugu: Uumasumik eqqussisinnaanermut akuersissutip saniatigut tunniussinermi aamma uumasumik angallassinissamut uppernarsaat immersugaq nassarneqassaaq – taanna uani downloadersinnaavat: ”Uumasunik assartuinermi uppernarsaat”.
Timmisartup iluani uumasoqarneq:
- Qimmit aamma qitsuit timmisartup iluani ilagineqarsinnaapput – uumasut allat nassatatut imaluunniit timmisartornermi assartukkatut angallanneqassapput.
- Uumasunik angallassinermi atorneqartartoq karsi imaluunniit pooqattaq imermik pitarneqarsinnaanngitsoq angissusaatalu uku qaangissanngilaat 55 × 40 × 23 cm.
- Uumasoq annerpaamik 8 kg-mik taassumalu angallanneranut karsi/pooqattaq atorneqartoq ilanngullugu oqimaassuseqassaaq.
- Uumasunik angallassinermi pooqattat nerumittuusuunissaat innersuussutaavoq, taamatut timmisartumi issiaffiup ataanut ajornanngitsumik inissinneqarsinnaasunngorlugit.
- Timmisartorneq tamaat uumasoq timmisartumi natermi issiaviup ataani karsimiiginnassaaq/pooqattamiiginnassaaq.
- Uumasoq ilaasunut allanut ajoqutaassanngilaq – aammattaaq tipeqarnermigut.
- Uumasoq aallanngitsiarnermi eqqissinartumik tunineqarsinnaavoq.
- Air Greenlandip uumasunik angallassinermi karsinik imaluunniit uumasunut pooqattanik nioqquteqarneq ajorpoq.
Uumasut timmisartumi assartukkanut inissiisarfimmiittut
Uumasoq uumasunik angallassinermi karsimi, uumasut inaanni imaluunniit uumasunut puuni akuerisaasumi angallanneqassaaq, taakku piumasaqaatit makku naammassisimassavaat:
- Uumasunik angallassinermi karsi ninngusuujussaaq, imermik pitarneqarsinnaani, eqqiluitsuulluni aamma tunillannartuiagaalluni.
- Naqqa atortunik isuguttamik milluaasinnaasumik assersimassaaq, soorlu assersuutigalugu sannakuaqqanik imaluunniit pilattornerlukunik. Ivikkat kanaartaannik aamma ivikkanik assersorneqarnissaa inerteqqutaavoq.
- Sanaajussaaq imatut; uumasup tassannga anilluni qimaanissaa, imminut ajoqusernissaa imaluunniit timmisartup assartugaasa ajoqusernissaat pinngitsoortissinnaallugit.
- Angissuseqassaaq uumasoq pisarnermisut nikorfanissaanut, illuanut saannissaanut imaluunniit aquinnissaanut periarfissaqarluni.
- Ungerutissiat nuiuussat inerteqqutaapput.
- Aallannginnermi uumasoq eqqissinartumik tunineqarsinnaavoq.
- Aalisakkat puussiamut poorneqassapput flamingo-boksimullu inissillugit.
Akiusoq aamma akiliineq:
Kiilumut akia malillugu akilerneqassaaq, nassatat allat tunniunneqareersut apeqqutaatinnagit, aamma oqimaassusissamik qaangiinertut tamakkiisuusutut akilerneqassalluni. Tassa uumasuutigisannik angallassineq immikkut akilerneqassaaq – nassatat allat illit bilitsinnut ilaareersut saniatigut.
Assersuut:
Akikinnermi angalasutut illit 20 kg nassarsinnaavatit nassatatut nalunaarutaareersutut, kiisalu 1 nassataq tigummiinnagassaq 8 kg-mik oqimaassusilik. Taakku nassatat amerlassusiat bilitsinni ilaareerput.
Uumasuutit ilagalugu angalassaguit – taava uumasumik angallassinertut uumasunut angallassinermi karsi ilanngullugu immikkut akilerneqassaaq. Tassa soorlu assersuutigalugu illit nassatatit taamaallaat 12 kg tunniussereersimaguit aamma nassataqarnak tigummiaannakkamik – taava uumasumik angalassineq immikkut akilertariaqassavat.
Akia aalajangerneqassaaq nassatat oqimaassusissaat sinnerlugit akigitinneqartoq malillugu. Nassatat oqimaassusissaasa sinnerlugit akiliut aalajangerneqartarpoq isorartussuseq tunngavigalugu, timmisartoqarfimmi aallarfigisassani taanna pissarsiarissavat.
Uumasuutigisamik angallassinermut tunniussinermi akiliuteqarneq pissaaq, ajoraluartumik nittartakkakkut akiliisoqarsinnaaneranut periarfissaqanngilaq.
Malugiuk:
Uumasuutigisanik nassartoqarsinnaanngilaq timmisartornerni ukunani: Island - Kalaallit Nunaat / Kalaallit Nunaat - Island kiisalu Canada - Kalaallit Nunaat / Kalaallit Nunaat - Canada.
Malugiuk Jettime-mik timmisartornerni timmisartumi assartukkanut inissiisarfik 0-1 gradinik kissassuseqarmat.