Timmisartornisssamut annilaanganeq

Air Greenlandimi ukiut 60-it sinnerlugit nunarsuatsinni nunat peqqarniiffiusinnaasut ilaannut tassanngaanniillu timmisartuussisarneq misilittagaqarfigaarput. Ilisimassavat isumannaatsuunissaq akiginngisaannaratsigu. Timmisartuutivut pissutsinik piumasaqaateqarfiunerpaat ilaannik akiuussinnaasutut timmisartuliaapput, aamma sulisuvut ilinniarsimasuullutik ilinnik angalanerit tamakkerlugu isumaginnittussanngorlugit.   

Oqarfigitigut - ikiussavatsigit
Nangaassuteqarnak oqaluttuutsigut timmisartornissannut toqqissisimanngikkuit. Ilisimagutsigu qanoq misiginerlutit ikiorsinnaavatsigit ilorrisimaarnartumillu angalanissat isumagalugu. Eqqaamajullu illit kisimiinnginnavit – ilaasut pingajorarterutaasa missaat toqqissisimannginnermik misigisaqartarput.

Sumut saaffiginnissavit?
Timmisartornissaq annilaangagigukku tamannalu inniminniininni nalunaarutigerusukkukku, taava bilitsimik pisiffigisat attaveqarfigissavat. Taamatut sullissineq immikkut akeqartinneqanngilaq. Innersuussutigaarput uagut piffissaqarluarluni attaveqarfigissagitsigut – kingusinnerpaamik aallannginnermi nal. akunneri 48-t sioqqullugit.

• Air Greenland: Bilitsit Air Greenlandip inniminniinermut portalia aqqutigalugu toqqaannartumik pisiarisimagukku Air Greenlandip Callcenteria aqqutigalugu atuisunut sullussivik attavigiuk imaluunniit sianerlutit uunga +299 70 12 12.
• Angalatitsivik: Angalatitsivik aqqutigalugu bilitsit pisiarisimagukku, taakku toqqaannartumik attaveqarfigissavatit.  
  • Air Greenland app: Aammattaaq periarfissaqarputit timmisartornissannut annilaanganerit Air Greenland app aqqutigalugu nalunaarutiginissaanut. 
    Imaaliussaatit: Air Greenland app ammaruk, uunngarit Profil og indstillinger, toqqaruk Rediger profil, ataani Andre detaljer og præferencer tassanilu Flyskræk ikillugu.   

Tunniussinermi:

• Piffissaqarluarfigilluarlugu takkutissaatit imminullu periarfissillutit tunniussinermi aamma security-mi tuaviorpallaarnak angalanissavit eqqissisimasumik aallartinnissaa. 
• Tunniussivimmi sulisugut nangaanak aperikkit timmisartumi issiaffissat immikkut salliutinniarnerit – soorlu assersuutigalugu pisuttarfiup eqqaaniissanersoq, tamaani inissaqarluarnerusarmat. Atlantikorsuaq qulaallugu timmisartoruit nammineq periarfissaqarputit issiavissannik siumut toqqaanissannut.

Timmisartorneq:

• Eqqaamallugu uagut isumannaatsuunissaq salliutinnerpaagatsigu, timmisartumilu saqisut misilittagaqarfigaat inuit timmisartornissaminnut annilaangasut ikiornissaat sungiusimavaat, taamaalilluni timmisartorneq sapinngisamik ilorrisimaarnartumik piniassammat. 
• Saaffiginninnissannut nangaassanngilluinnarputit annikitsumilluunniit ilorrisimaarunnaassagaluaruit.

Siunnersuutitsialaat:

• Eqqissisimasumik qingakkut ilummut naatit tikillugit anersaartorit arriitsumillu silammut anersaarlutit. Taamatut arlaleriarlutit anersaartussaatit, tamanna timip eqqissinissaanut iluaqutaasarpoq. 
• Atuakkamik nuannersumik nassarit, filmimik isiginnaarit imaluunniit nipilersukkanik nuannarisannik tusarnaarlutit – imaluunniit arlaannik ilinnut eqqissinartumik.
• Arlaannik sungiusimasarinngisannik misigisaqaruit – soorlu timmisartup atortuisa nipaannik, silaannaap naqitsinerata allanngornera imaluunnit misigisimallugu qutsissorujussuarmiinneq, taava ilisimassavat tamakku nalinginnaasuummata.
• Air Greenlandip appiani ”Aviisit aamma atugassiat” aammattaaq tusarnaarsinnaavat podcastimi tulleriiaat immiussat ”Timmisartornermi ernumasartunut ikiuut”

Neriuppugut pisariaqartitannik paasissutissanik pissarsisimasutit, taamaanngippat nangaanak attaveqarfigissavatsigut.

Timmisartumut tikilluaqqunissat qilanaaraarput.