Air Greenlandimi illit isumannaatsuunissat aamma ilorrisimaarnissat uagut salliutillugu pingaartitarinerpaavarput. Ilaasunut amerlanerpaanut 10 kilometerisut qatsissuseqarneq aamma nal. akunneranut 900 km angullugit sukkassuseqarluni timmisartorneq ajornartorsiutaanngilaq.
Kisianni allanut – soorlu assersuutigalugu naartusunut, anigorsinnaanngisaminnik napparsimasunut imaluunniit pilatseqqammersunut – immikkut qanoq iliornissamut piareersaatit eqqarsaatigisassaapput.
Tamatigut innersuussutigisarparput angalasut immikkut peqqissutsimikkut mianerisassaqartut namminneq nakorsartik isumasiortassagaat, aamma tamanna ilutigalugu ataani allassimasut malittarisassat nalinginnaasut malittassagaat, taamatut angalaneq sapinngisamik toqqissisimanartumik ilorrisimaarnartumillu piniassammat.
Anigorsinnaanngisaminnik napparsimasut
Uummatikkut imaluunnit anersaartorniarnikkut ajornartorsiuteqaruit, taava timmisartup iluani silaannaap naqitsinera iluaagineqarsinnaavoq. Najoqqutariuminartuuvoq: Ajornanngitsumik 1. salimut majuarlutillu ammukarsinnaaguit, taava timmisartornissaq aammattaaq sapissanngilat. Taamaattorli inassutigiuaannarparput illit nakorsavit oqaloqatiginissaa eqqissillutit angalaniassagavit.
Pilatseqqammerpit?
Qanittukkut pilatseqqammersimaguit illit nakorsavit attaveqarfiginissaa ilinnut inassutigaarput, taamatut timmisartorsinnaanersutit aamma qanoq iliornissamut piareersaateqarnersoq paasiniarlugit.
Nappaatit tuniluuttartut
Tulliuttut arlaat nappaatigigukku piffissami tuniluussiffiusup nalaani timmisartoqqusaanngilatit:
- Mæslingeruit
- Aappaluarnermik nappaateqaruit
- Kuppeeraruit
Ilummoornermik aamma savarnermik nappaateqaruit nappatip timinniinnerani timmisartoqqusaanngilatit.
Ataatsimut isigalugu timmisartoqqusaanngilatit nappaatit tuniluullutik ulorianartut nappaatigigukkit.
Nakorsatit aamma ilt
Nakorsaatit tamaasa pisariaqartinneqartut ilinnit tigoriaannanngorlugit timmisartorneq tamaat tigummiaannakkatut nassarneqassapput. Timmisartornerup nalaani silaannarmik iltimik pisariaqartitsileruit imaluunniit nammineq iltilersuuteqaruit angalalinnginnermi piffissaqarfigilluarlugu uagut attaveqarfigissavatsigut.
Ikiorneqarnissannik pisariaqartitsivit?
Angalanerup nalaani ikiorneqarnissannik pisariaqartitsiguit bilitsimik pisiffigisat attaveqarfigissavat.
Air Greenland: Air Greenlandimi bilitsinik inniminniisarfiani portalimi bilitsit pisiarisimagukku, taava Air Greenlandip Callcenteria una aqqutigalugu Attaveqarfigitigut, imaluunniit uunga sianernikkut +299 70 12 12 attaveqarfigissavatit.
- Angalatitsivik: Bilitsit angalatitsivik aqqutigalugu pisiarisimagukku, tassunga toqqaannartumik attaveqassaatit.
Sullissinerit ilaat bilitsip akianut ilaapput, kisiannili allat akiliinikkut neqeroorutigineqarlutik. Tamanna pillugu sukumiinerusumik atuaruk Sullitanik Kiffartuussiviup quppernera aqqutigalugu ”Angalanissamut ikiorsiivik”.
Imigassaq aalakoornartortalik aamma aanngajaarniutit
Timmisartup iluani silaannaap naqitsinerata kinguneranik timit illit sungiusimasannit allaanerusumik imigassamit aalakoornartortalimmit sunnerneqarsinnaavoq. Isumannaallisaaneq aamma ilaasut allat eqqarsaatigalugit Air Greenlandip ilaasussat aalakoortut aanngajaarniutinillu sunnertisimasut ikinissaannut itigartissinnaavai. Aammattaaq Air Greenlandip timmisartornerup nalaani imigassamik aalakoornartortalimmik sassaalliuteqarnissani itigartitsissutigisinnaavaa.
Ilaasut malunnarluinnartumik aalakoortut Air Greenlandip timmisartuussinissaanut ilaaqqusaanngillat. Taakku sunnerteqqasut timmisartornerup nalaani isumannaallisaanermik ajornartorsiortitsisinnaapput ilaasunillu allanik tujormisitsisinnaallutik.
Tamakku kingunerinik aningaasartuutit tamaasa (soorlu ass. ineqarneq aamma nerisaqarneq) ilaasup pineqartup nammineq akilissavai.
Ilaasut ikeqqusaanngitsut
Tamatuma kinguneranik aningaasartuutaasinnaasut (soorlu ass. ineqarnermut aamma nerisaqarnermut) ilaasup nammineq akilissavai. Ilaasussat ikeqqusaanngitsut inniminniinertik annaassavaat allamillu bilitsimik namminneq pisissallutik.
Ilaasut aalakoortut itigartinneqartut aamma qunusaarisut imaluunniit persuttaasut ingerlaannartumik politiinut unnerluutigineqassapput. Tamanna aammattaaq ilaasunut aanngajaarniutinit imaluunniit assigisaannit allanit sunnertisimasunut atuuppoq.