Air Greenlandimi illit isumannaatsuunissat aamma ilorrisimaarnissat salliutittuaannarparput. Ilaasut tamarmik toqqissisimasumik aamma ilorrisimaarnartumik angalaniassammata immikkut pisoqartillugu Air Greenland erseqqissumik nalilersuinermini ilaasussanik itigartitsisinnaavoq – sapinngisamik malunnanngitsumik.
Ilaanissamik itigartitsinermut patsisaasinnaasut
Air Greenland imminut pisinnaatippoq ilaasunik itigartitsinissamut, makku patsisigalugit:
- Isumannaallisaanermik misissuinermi ilaasoq misissortikkusunngippat imaluunniit nassatani misissortikkusunngippagit.
- Timmisartuutileqatigiiffimmut imaluunniit allanut qunusaarippat (soorlu ass. qaartartoqarneranik qunusaarilluni).
- Timmisartuutileqatigiffiup isumannaallisaanermut malittarisassaanik malinnikkumanngippat.
- Imigassamik aalakoornartortalimmit, aanngajaarniutinit imaluunniit nakorsaatinit sakkortuunit sunnertisimappat.
- Naalasseriitsuuppat pissusilersorpallu imaluunniit tarnimigut/timimigut qanoq innera ilaasunut allanut ulorianartorsiorfiusinnaallunilu imaluunniit nuanninngitsuliorpat.
- Timimigut ima ajortigisumik sanngiiffeqarpat pilersaarutaasumik timmisartornissamini qularnanngitsumik peqqissutsimigut ajortissinnaappat imaluunniit toquneranik kinguneqarsinnaappat.
- Timmisartornerup nalaani nakkutigineqarnissaminik pisariaqartitsippat imaluunniit qanorluunniit ittumik paarineqarnissaminik pisariaqartitsilluinnarpat aamma timmisartornermi tulluartunik piginnaanilimmik ingiallorteqanngippat.
Qanoq pisoqassava ilaasussaagaluartoq ilaanissaanik itigartinneqarpat?
- Ilaasussaagaluartup itigartinneqartup inniminniisimanini annaassavaa nammineerlunilu bilitsimik nutaamik pisissalluni.
- Immikkut aningaasartuuteqartoqarpat (soorlu ass. hotel aamma nerisaqarneq), ilaasussaagaluartup tamakku nammineq akilissavai.
- Ilaasut qunusaarisutut pissusilersortut imaluunniit persuttaasut ingerlaannartumik politiinut unnerluutigineqassapput.