Timminissat akunnernik sisamanik sivisunerusumilluunniit kinguaattoorpat Air Greenland ilaasunut tamanut nerinissamut uppernarsaammik neqeroortarpoq.
Nerinissamut uppernarsaatit tapiissutitut isigineqassapput, ilaasut ataasiakkaat nerinermut aningaasartuuteqarnerunerannut matussutissatut.
Kinguliani paasissutissat tassaapput qanoq qaqugukkullu nerissutissat tunniunneqartarnersut sumiinnerit apeqqutaatillugu.
Nuummi kinguaattoruit - nerinissamut uppernarsaat elektroniskiusoq
Timminissap taamaatinneranut imaluunniit akunnerit sisamat sinnerlugit kinguaattoortoqartillugu Nuummiikkuit, mailikkut elektroniskiusumik nerinissamut uppernarsaammik nassinneqassaatit, sms-ikkullu ilisimatinneqarlutit.
Taamaattumik attaviit taakku alaatsinaattuarnissaat pingaaruteqarpoq, qulakkeerlugu inniminniininni attavigineqarnissannut eqqortumik paasissutissaqartoq.
Makku maluginiartakkit
- Nerinissamut uppernarsaat ataasiaannaq atorneqarsinnaavoq.
- Attavissat arlaqartut atorlugit nerinissamut uppernarsaammik nassiussarsiat uppernarsaaataavoq ataasiaannaq atorsinnaasoq, naak attaviit arlaqartut atorlugit nassiunneqaraluartoq.
Uppernarsaatissatit ima tigusinnaavatit
- Uppernarsaat e-mailimut inniminniinermit pingaarnertut attavissatut nalunaarsorneqarsimasumut nassiunneqassaaq.
- Inniminniinermi ataatsimi arlaliullusi angalagussi, ilaasut nerinissamut uppernarsaataat tamarmik e-mailimut tassunga nassiunneqassapput.
- E-mail ammarsinnaanngikkukku sumiiffimmi mittarfimmi sulisut attavigisinnaavatit, taakku imaaliorsinnaapput
- Attavigineqarnissannut paasissutissat nutartissavaat, uppernarsaat ilinnut nassiuteqqillugu. Attavigineqarnissamut paasissutissat nutartikkat aamma angalaqqissagaluaruit atorneqarsinnaassapput.
- Uppernarsaatissat naqillugu tunniullugu
Air Greenland app
- Club Timmisa-mut atuisutut iserfissannut iseruit, aammalu angalanissat nalunaarsorilli, illit nammineerlutit nerinissamut uppernarsaatissatit Air Greenlandimut app-ip saqqaani ersissapput.
- Nerinissamut uppernarsaatit nammineerlutit atugassaraatit, taamaallaallu angalasut ataasiakkaat app-ianni ersissallutik. Inniminniinermut normu ataaseq atorlugu arlaqarlusi angalagussi, inuit tamarmik namminneq app-iminnut iserlutik nerinissamut uppernarsaatissatik takusinnaavaat.
- Nerinissamut uppernarsaatit pissarsiariniarlugit:
- App-eq aassavat
- Akeqanngitsumik Club Timmisa-mut atuisunngussaatit. Uani qanoq iliussanerlutit takusinnaavat
- Isissaatit
- Angalanerit nalunaarsussavat
Malugiuk, inuit 18-it sinnerlugit ukiullit kisimik Club Timmisa-mut atuisunngorsinnaammata. 18-it inorlugit ukiulinnik angalaqateqaruit, nerinissamut uppernarsaatissaat e-mail-imi nassiunneqartumi pissarsiarisinnaavatit.
Uppernarsaatit qaqugukkut nassiunneqassappat?
Nerinissamut uppernarsaat nalinginnaasumik ima nassiunneqartarpoq:
- Ullormi angalaffimmi kinguaattoornermi: angalanissamut pilersaarummit akunnerit sisamat missaasa kingornagut
- Ullormi angalaffimmi taamaatitsisoqarpat: Angalanissamut pilersaarutip nutaap tiguneraniit minutsit 15 missaanni qaangiuppata (akunnerit sisamat sinnerlugit kinguaattoornermi). Siusinnerpaamik kl.8:00
- Ulloq angalaffissat sioqqullugu taamaatitsisoqarpat kinguaattoortoqarluniluunniit: Pilersaarutaaqqaartutut aallarfissami nal. qulinngortinnagu
- Assersuut: Aallarfissat ullunik marlunnik sioqqullugu timminissat allanngorpat pilersaarutaasutut angalaffissanni ullaap tungaanit uppernarsaammik nassinneqassaatit.
Sivisunerusumik kinguaattoortoqartillugu
- Ulluni arlalinni kinguaattoortoqartillugu uppernarsaat ullut tamaasa nassiunneqartassaaq.
- Nalinginnaasumik qulinngortinnagu ullormi tassani nerinissamut uppernarsaatit nutaat nassiunneqassapput, kiisalu ilaatigu aqaguani ullaakkorsiornissamut.
Ullaakkorsiutit
Ullaakkorsiornissamut uppernarsaammik nassinneqarnissanni apeqqutaavoq unnuiffigisanni ullaakkorsiorneq ilaanersoq.
Uppernarsaammik atorunnaarsitsineq
Uppernarsaatit nammineerlutik atorunnaartarput illit angalaqativilluunniit:
- Angalanissaq taamaatikkaangagu
- Aallarnissamut siusinnerusumut inniminniisoqarsimappat
- Unnuiffik allanngortinneqaraangat nerisaqarneq ilaalluni.
Uppernarsaat makkunani atorneqarsinnaavoq
Nerinissamut uppernarsaat caféni, neriniartarfinni niuertarfinnilu aaqqissuussinermut peqataasuni atorneqarsinnaavoq. Kikkut pineqarnersut takusinnaavatit uani
Eqimattanik angalaqateqaruit imaluunniit angalanissat angalatitsivimmi allami inniminnersimatillugu
Eqimattat anginerumaat angalaqatigigukkit imaluunniit angalanissat allami inniminnersimallugu ajoraluartumik tamatigut attaviginissannut paasissutissat eqqortut tiguneq ajorpavut. Taamaattumik sumiiffinni sulisutsinnut saaffiginnissaatit taakkulu attavigineqarnissannut paasissutissat nalunaarsussavaat, nerinissamullu uppernarsaatinik nassillutit. Angalanermi paasissutissanik allannguinerup kingorna uppernarsaataasinnaasut attaviginissannut paasissutissanut taakkununnga nassiunneqassapput, saaffiginneqqinnissat pisariaarulluni.
Timmisartumut ikinissannik mattunneqaruit imaluunniit ingerlaqqinnissannut ilaaffissat annaasimallugu
Timmisartumut ikinissannik mattunneqaruit imaluunniit Nuummiit ingerlaqqinnissannut aqqutissat annaasimallugu mittarfimmi sulisunut saaffiginnissaatit, taakkulu nerinissamut uppernarsaammik pissarsinissat isumagissavaat.
Nuummi najugaqartunut
Illoqarfimmi najugaqarfigisanni sapernguguit nalinginnaasumik nerinissamut taperneqassanngilatit, taamaattumillu nerinissamut uppernarsaammik tunineqarnaviarnak. Isumaqaruit kukkusumik nerinissamut uppernarsaaserneqarnak, angalanerillu Nuummi aallartilluni, sumi najugaqarnerit uppernarsartariaqarpat soorlu najugaqarnermut uppernarsaammik.
Kalaallit Nunaanni ornigassani allani kinguaattooruit
Mittarfimmi heliportimiluunniit sulisut attavigisinnaavatit nerinissamut uppernarsaammik tunineqarlutit.
Maluginiaruk illoqarfimmi taamaatitsiviusumi najugaqaraanni nerinermut aningaasartuutinut tapiisoqarnavianngilaq, taamatullu nerinissamut uppernarsaammik tunniussisoqarani.
Ilaquttanni ikinngutinniluunniit unnuiniaruit unnuinermut aningaasartuutit Air Greenlandip matussusernavianngilai. Tassalu imaappoq periarfissaqaruit nammineq najugaqassallutit saperngullutillu nalinginnaasumik nerinissamut uppernarsaammik aamma tunineqarnavianngilatit.