Air Greenlandip timmisartuussineri Air Greenlandip nalinginnaasumik atugassarititai, nunap inatsisai, Kalaallit Nunaanni immikkut inatsisit aamma Namminersorlutik Oqartussanut isumaqatigiissutit tunngavigalugit nalinginnaasumik ingerlanneqartarput.
EU-mi peqqussutit, ilaatigut Europaparlamentimi tassanilu Siunnersuisoqatigiit peqqussutaat 2004-02-11-meersoq, timmisartumut ikinissamut itigartitsinermut, timmisartuussinissanik taamaatitsinermut imaluunniit annertuumik kinguaattoornermi taarsiiffiginninnermut aamma ikiuinermut, kiisalu peqqussutip (EØF) nr. 295/91 (Peqqussut 261/2004) atuukkunnaarsinneranut, ataatsimoorussamik aalajangersakkanut tunngasut timmisartuussinerit ilaannut atuupput.
Air Greenlandip aallarfissat eqqorlugu aallarnissat sapinngisani tamaat eqqortinniartarpaa.
Nunamit EU-mut ilaasortaasumit aallassaguit taamaatitsisoqarpat imaluunniit kinguaattoortoqarpat, EU-p peqqussutaa 264/2004 naapertorlugu Air Greenlandip taarsiissuteqarfigisinnaavaatit.
Air Greenlandimit erseqqissaatigissavarput timmisartuutileqatigiiffik nunatsinni angerlarsimaffeqarmat, tassa EU-mi timmisartuutileqatigiiffiunani.
Taamaattumillu nunatsinniit nunamut EU-mut ilaasortaasumut aallartoqartillugu EU-mi taarsiissuteqarnissamut peqqussutit atuutinngillat, taamatullu aamma nunatta iluani timmisartuussinernut atuunnatik.
Taarsiivigineqarnissamut pisinnaatitaaffeqarsinnaavutit, apeqqutaalluni kinguaattoornermut peqqutaasoq, aammalu Air Greenlandip pissutsit immikkut illuinnartut pinngitsoortinniarlugit iliuusaasinnaasut tamaasa eqqortikkaluarpagilluunniit, kinguaattoorneq pinngitsoortinneqarsinnaasimanngippat.
Aammattaaq piumasaqaataavoq kinguaattoornerup nassataanik ornitamut tikinneq pilersaarutaasumit nal.ak. pingasut qaangiutereerneranni pippat.
Kinguaattoornerit taamaatitsisoqarneraluunnit pissutsinik Air Greenlandip aqussinnaanngisaanik peqquteqarpat, taarsiivigineqarnissamut pisinnaatitaaffiit atuukkunnaassaaq.
Taakkualu makkuusinnaapput soorlu :
• Silap pissusaa
• Suliumajunnaarnerit, ingerlatsinermut ajoqutaasut
• Politikkikkut allanngorartoqarnera
• Air Traffic Control-imiit aalajangiinerit
Air Greenlandip timmisartuussinerit Air Greenlandimit bilitseqarluni angallassiffiit kisiisa akisussaaffigai, timmisartuutileqatigiiffik alla atorlugu ingerlaqqittussaaguit, ingerlaqqinnissavit allanngortinnissaa pillugu timmisartuutileqatigiiffik taanna attaveqarfigissavat.
Tamanna aamma Air Greenlandimit bilitseqarnerup saniatigut angalanissanut sunulluunniit tamanut atuuppoq.
Nal.ak. tallimat sinnerlugit kinguaattooruit, bilitsisiavit akiata utertinnissaanut pisinnaatitaavutit. Bilitsip akia utertikkukku, angalanissaq tassunga attuumassutilik tamarmi atorunnaassaaq.
Bilitsip akia utertinneqarpat, Air Greenland qulaani taaneqartutut ikiuinissamut pisussaaffeqanngilaq, taarsiiffiginnittoqassanngilarlu.
Nittartakkatsinni tuugassaq ilaaffissara kinguaattoorpoq, toorlugu ullormi angalaffiusussami Air Greenlandip ikiuutitut neqeroorutai atuarsinnaavatit.