Uani quppernermi akit, atugassarititaasut aamma pissutsit piviusut pillugit paasissutissat tulluartut pissarsiarineqarsinnaapput meeqqat ilagalugit angalanissannik pilersaaruteqaruit, paasissutissanik erseqqissumik aamma tamanik ilisimanninnissannik ilinnut iluaqutissiisunik.
Bilitsit akii aamma nassatat:
Akit aamma nassatat pillugit atugassarititat meeqqap ukuia aamma bilitsip toqqarneqartup qanoq ittuunera apeqqutaallutik:
Naalungiarsuit qassinik qaammateqartut timmisartorsinnaappat?:
Innersuussutigaarput naalungiarsuutivit peqqittup ikinnerpaamik ullunik 7-inik ulloqartup siullerpaamik timmisartorsinnaanera. Angalanissap inniminninnginnerani nalornissuteqaraanni peqqinnissaqarfimmi sulisut aperineqarsinnaapput. Naalungiarsummik nangilersorfik aamma babylift nassarneqarsinnaapput.
Inersimasup taamaallaat meeraq marluk ataallugit ukiulik ataaseq angalaqatigisinnaavaa:
Isumannaallisaaneq pissutigalugu inersimasup ataatsip meeraq 2 ataallugit ukiulik ataaseq angalaqatigisinnaavaa. Meeraq inuup 15-it qaangerlugit ukiullip sarliassavaa namminerlu isumannaallisaanermi qitequteqartinneqassallunilu annanniuteqartinneqassaaq.
Qanoq iliussavit meeqqanik arlalinnik 2 ataallugit ukiulinnik angalaqateqarniaruit?:
Meeqqanik arlalinnik 2 ataallugit ukiulinnik angalaqateqarniaruit angalanermi immikkut inersimasumik ilaqartoqartariaqarpoq. Tamanna patsiseqarpoq timmisartup iluanit qimagussuisoqassappat meeqqamut ataatsimut inersimasoqartariaqarmat.
Meeqqat 12 qaangerlugit ukiullit:
12-it sinnerlugit qummullu ukiulinnut inersimasutut bilitsi atuutsinneqassaaq, aamma meeraq ilaasutut inersimasutut atuuttut malittarisassat malillugit angalassaaq. Taamaattorli isumannaallisaanermi qanoq iliornissamut piareersaatit atuutsinneqassallutik – soorlu ass. meeqqat mikisut ajornartoornermi anisarfiup eqqaani issiassanngillat.
Qitornat kisimiilluni angalassava?:
Takuuk meeraq ingiallorteqarani angalasoq pillugu immikkoortoq: Meeraq ingiallorteqanngitsoq
Qitornat allamit ilaasumit ingiallorteqassava?:
Ilaasumit qitornat ingiallorteqassappat, taanna 16-inik ukioqalereersimassaaq.
Babyliftimik inniminniineq:
Akikinnermi:
Airbus-timmisartuutitsinni Nuup Københavnillu akornanni timmisartornermi Air Greenlandimi akikinnermi meeqqanut qaammatit 9-t ataallugit qaammatilinnut (annerpaamik 11 kg aamma 65 cm) babylift neqeroorutigaarput. Babyliftip atornera akeqanngilaq.
Liftit amerlassusiat killeqarpoq, taamaattumik innersuussutigaarput piffissaagallartillugu inniminniinissaq – aamma kingusinnerpaamik aallarnissaq nal. akunnerinik 24-nik sioqqullugu una ”Atuisunut sullissivik attavigiuk”, imaluunniit uunga sianerluni +299 70 12 12, imaluunniit bilitsimik pisiffigisaq angalatitsivik aqqutigalugu.
Premiumklasse:
Babylift Premium-klassini inniminnerneqarsinnaanngilaq.
Nassatat:
Meeqqat 2 ataallugit ukiullit: 10 kg nassataq + klapvogni oqitsoq sialussiutitalik (110 × 25 × 25 cm).
Meeqqat 2 sinnerlugit ukiullit: Inersimasunut malittarisassat atuuttut assigalugit.
Barnevognit aamma klapvognit:
Barnevognit aamma klapvognit pisattanut tunniussanut ataatsimut amerlassusiannut ilaassapput, oqimaassusissamik qaangiinermut akiliuteqartoqarnissaa noqqaassutigineqassanngilaq nassatat amerlassusissaat immikkut akeqartinneqanngitsoq qaangerneqanngippat.
Barnevognit/klapvognit tunniunneqarneranni patitinneqarsimassapput, immikkullu barnevogninut puussianut plastikimut ninngusuumut poorneqarsimassallutik. Taakku Nunatsinni mittarfeqarfinni tamani aamma Københavnimi tunniussinermi pisiarineqarsinnaapput 50 kr.-nik akilerlugit.
Qulimiguulimmik angalanermi ingerlaqqinnermi assakaasui peerneqarsimassapput aamma timitaanut ikkunneqarlutik.
Timmisartumi nerineq:
Kalaallit Nunaata aamma Danmarkip akornanni timmisartuussinerni naalungiarsunnut imaluunniit meeqqanut nerisassanik inniminniisinnaavutit. Nerisassat nittartakkakkut angalanissap inniminnernerani inniminnerneqassapput, taamaanngippat aallarnissamut kingusinnerpaamik nal. akunneri 48-t qaangiutsinnagit. Nerisassanik inniminniinermut paasissutissat amerlanerit nassaarikkit uani
Aliikkutassat:
Air Greenlandip Atlantikorsuaq qulaallugu Tuukkaq -mik timmisartuussinerani meeqqanut aliikkutassat neqeroorutigineqarput tassaasut titartakkanik filmiliat, spil kiisalu nipilersukkat aliikkutassaqartitsinermut atortoq aqqutigalugu. Timmisartup iluani aliikkutassaqartitsineq pillugu paasissutissanik suli amerlanerusunik pissarsiarineqarsinnaapput uani.
Naalungiarsunnut nangilersuiffik:
Danmarkip aamma Kalaallit Nunaata akornanni timmisartuussinermi anartarfimmi ikinnerpaamik ataatsimi naalungiarsunnut nangilersorfeqarpoq.
Timmisartup iluanut tikilluaqquneqarnissarsi qilanaaraarput, angalalluarnissassinnik kissaappatsigit!